Majones
Frå Wikipedia – det frie oppslagsverket
Majones er ein kald, tjukk saus som er ein emulsjon av eggeplommer og matolje. Eggeplommene gjev sausen ein lys gul farge. Matolja som vert brukt, kan vera soyaolje eller ei anna smaksnøytral vegetabilsk olje. I tillegg til egg og olje er det eddik eller sitronsaft og salt og krydder i majones. Majones er ein svært feit saus som kan innehalda opp mot 80 prosent feitt. Matvareindustrien lagar også lettmajonesar, men også dei vil ha ein høg feittprosent.
Det finst fleire ulike teoriar om til kva høve majones fyrste gong vart laga, men alle synest å vera einige om at det i alle fall var i Frankrike, og at sausen der har vore kjend minst sidan på midten av 1700-talet, og somme meiner at sausen er langt eldre enn det òg.
Majones er grunnlaget for ei rekkje andre kalde sausar, til dømes remulade, og for mange påleggssalatar, til dømes italiensk salat.
