Athen
Vun Wikipedia
Athen (greeksch Αθηναι = Athinai) hett sien Naam vun de greeksche Göttin Athene un is de Hööftstadt vun Grekenland. De Stadt liggt in dat Küstenflachland van den Äginetischen Golf.Twüschen den 156 m hogen Kalkfelsen mit de Akropolis un den 277 m hogen Lykabettos-Felsen breedt sik dat Hüsermeer van de ne'e Stadt ut. In de Tiet van de Türkenherrschap över Grekenland (15.-19.Jh.) weer Athen to enen Oort ahn Bedüden afsunken. Eerst mit dat Upstahn van dat ne'e Grekenland vör 170 Jahren wurr Athen wedder de Middelpunkt van dat kulturelle un weertschapliche Leven. Neven de Ruinen ut de olen Tieden wurnn ne'e moderne Regeergeböden, de Universität, de Technische Hoochschool un vele Museen upboot.Up de sünnigen, breden Straten is unbannig veel Verkehr un darum is de Luft in Athen so öwel as in kuum ene annere europääsche Grootstadt. Groot-Athen is mit de Havenstadt Piräus tosamenwussen un besteiht ut 88 Gemeenden mit rund veer Millionen Inwahners. Dat sünd gode 40 % van de 10,3 Millionen Greken.
De Akropolis is dat Wahrteken van Athen. Dat Ingangsdoor sünd de Propyläen. Well dar dörgeiht, kann den Nike-Tempel, den Parthenon un dat Erechtheion bewunnern. To Föten van de Akropolis liggt dat ole Theater ut de Antike. Wietere beröhnte Geböden sünd dat Odeon, de Theseustempel un dat ole Königsslott, dat vandagen as Parlamentsgeböde deent. To enen Besöök in Athen höört up jeden Fall en Bummel dör dat Ooltstadtviddel mit den Naam Plaka.
In dat Panathinaikos-Stadion funnen 1896 de eersten Olympischn Spele van de Neetiet statt. För de Olympiade 2004, de na Athen inberopen wurr, muss en groot neet Stadion boot weern.
[Ännern] Attraktschonen
- Akropolis
- Agora
- Plaka
[Ännern] Historie
Athen is - mit de Verfaat vun Solon un denn de Reform vun Kleisthenes - de eerste Demokratie in de Historie wesen. Beamte wurrn dör dat Los funnen ellers wählt, de meesten Ämters sünd tiedlich limiteerd wesen. Prominente Politiker, de dör ehr Macht de Demokratie bedrohen, kunnen na Afstimmen tiedlich limiteerd in'ne Verbannung schickt warrn (Ostrakismos, up Platt: „Schörengericht“).
To Anfang vun dat 19. Johrhunnert is dat instmaals so mächtige Athen bloots noch en lütt Dörp wesen. In'n greekschen Unafhängigkeitskrieg gegen dat Osmanisch Riek wurrn grote Delen vun de Akropolis toschannen maakt, as dat törksche Munitschonsdepot, dat dar leeg, exploderen de. De eerste greeksche König, Otto I. ut dat Huus Wittelsbach, hett Athen to'n Hööftstadt utbuen laten un hett vele klassizistisch Hüüs in'n Updrag geven.
[Ännern] Bekannte Athener
- Solon
- Kleisthenes
- Perikles
- Peisistratos
- Alkibiades
- Sokrates
- Miltiades
- Sophokles
- Themistokles
- Demosthenes
