Boca Juniors
Da Wikipedia
O Club Atlético Boca Juniors (CABJ) o l'è 'n club sportivo d'a çittæ de Buenos Aires, Argentinn-a.
Ûn de quelli che ciû èscito e popolaritæ g'han into Pàize, o s'attrêuva tra i çinque "grandes" d'o calcio argentin. Con gran repûtassion a livello mondiale, o l'è quello che ciû vòtte o l'ha vinto campiônâti internaçionâli ûffiçiâli (17 vòtte). Insëmme a River Plate, co-o quæ o g'ha 'na tradissionâle rivalitæ, o conserva a maggioransa d'i tifôxi d'o sport in Argentinn-a.
Stabilïo into quartæ ("barrio") de La Boca, inscia riva d'o Riachuelo, o l'è stæto fôndòu into 1905, e o zêuga inta primma divixôn d'a liga de calcio argentin.
I tifôxi vëgnan ciammæ ancôn "Xeneizes", paròlla c'a l'è 'na degenëassiôn d'o gentilìssio "zeneize", testimôniansa d'a influensa lìgûre inta çittæ de Buenos Aires. Inti primmi anni d'a squaddra, a concorrensa a l'ëa maggiôritâjamente d'immigranti italiani sôviatûtto de Zena. O l'è stæto pe quello che s'ha comensòu a dêuviâ o sôvianomme "Xeneize" pe ciammâ a qualônque cosa che se riferîse a-o club. A grafïa a l'è stæta ûffiçialissä da-a dirigensa d'a squaddra inti anni 1990 e ghe l'han missa in maggette inscia pârte inferiôre d'a schenn-a. Into 2005, pe festezzâ o çentenâjo d'o Club Atlético Boca Juniors, 'sto tèrmine o l'è stæto dêuviòu pe rappresentâ 'na pûbbliçitæ dôve a paròlla "Xeneize" se mescciûava con "Centenario", forma spagnòlla de "çentenâjo", pe diventâ "XENTENARIO".
O stàddio Alberto J. Armando, ciammòu de sovente "La Bombonera" (casse de bomboîn) pe-e tribûnn-e ârte che ghe dan forma de cassa, o l'è ûn d'i ciû famôsi e mitologici d'o Pàize, calificòu da Diego Maradona comme "tèmpiu d'o calcio". Segôndo 'n stûddio ingléize, 'na partïa inta Bombonera o l'è o ciû grande spettàcolo sportivo d'o môndo. E partïe de ballôn co-o famôso entûxiasmo d'i tifôxi, e lûxi, e bômbe, i papæ de côoi, e o "carlevà" d'a gente de Boca, fan pârte de 'n spettacolo c'o no s'ascorda mâi ciû.
[Modificâ] Scia legga ascì
La Boca (Buenos Aires), pe 'na descrissiôn d'o quartæ zeneize d'a çittæ de Buenos Aires.
