Neon

Neon (gr.: νέος neos „nieg“ ) is en Cheemsch Element mit dat Atomteken Ne un de Atomtall 10, wat tosamen mit Helium, Argon, Krypton, Xenon un Radon en Eddelgas dorstellt. In dat Periodensystem steiht dat ganz rechts, wat andüüdt, dat Neon en vulle butenste Elektronenschaal opwiest. Dorüm kann dat Gas ok nich so licht mit sik sülvst oder annere Elementen reageeren. In de Natur kummt Neon as atomar Gas vör un billt keen Molekülen. Opdeckt worrn is Neon 1898 vun Sir William Ramsay un sien Mitarbeiter Morris William Travers.

[Ännern] Vörkamen

Neon is en roor Element, dat as atomaret Gas in de Luft to finnen is un vun de Männichkeit vun de Elementen an de 77. Steed steiht. In’n Weltruum is Neon aver na Waterstoff un Helium dat drüttfakenste Element. Technisch warrt Neon ut de Luft wunnen. Dorför warrt dat Verfohren vun de frakschoneerte Destillatschoon ut fletige Luft bruukt.

[Ännern] Egenschoppen

Neon hett keen Geruch, Gesmack oder Farv. Ünner de Eddelgasen is dat dat tweetlichteste. As bi de annern liggt Neon atomar vör, wat an de kumplette Achterschaal liggt, de dat Gas bestännig warrn lett gegen Reakschonen mit annere Elementen. Verbinnen mit annere Elementen gifft dat vun Neon dorüm nich. In Gasentladungsrohren lücht Neon afhangig vun’n inneren Gasdruck root-orange, blauvigelett oder rootvigelett. Betogen op dat Volumen hett Neon en 40-mol gröttere Küllkapazität as Helium un 3-mol gröttere as Waterstoff. Neon hett vun de Eddelgasen de gröttste Entladenspannung un den gröttsten Entladenstroom.

[Ännern] Verwennen

Neon in en Lüchtstoffrohr.

Bruukt warrt Neon faken as Lüchtstoff in Gasentladungsrohren, dor lücht dat Gas in rode Farv. De Lüchtstoffrohrn, de dat grelle witte Licht maakt, warrt faken ok as „Neonrohr“ betekend, man dat is eegentlich vekehrt, as dor normaalerwies Argon mit en beten Quecksülver binnen is. Neon warrt sonst ünner annern noch bruukt in Bildrohren, digitale Lüchtreklaam, Kontrolllüchten, Stroboskoplampen, Helium-Neon-Laser, as Schuulgas oder ok fletig as Köhlmiddel.