Bruttobinnenlandprodukt

Vun Wikipedia

Dat Pro-Kopp-BBP in de EU-Länner

Regionen mit dat hööchste BBP pro Kopp in de EU

Regionen mit dat leegste Pro-Kopp-BIP in de EU

Mit dat Bruttobinnenlandprodukt (Afkörten: BBP, düütsch: „Bruttoinlandprodukt“, engelsch: gross domestic product, afkört: GDP) kann een meten, wat en Volksweertschop tostann bringt. Dat gifft dat nominale Bruttobinnenlandprodukt un dat reale Bruttobinnenlandprodukt (kiek ünnen).

Mit dat BBP weert all Woren un Deenstleisten mit jem ehr aktuellen Priesen up’n Markt tohopenfaat. Dat gellt avers bloß för de Woren un Deenstleisten, de in dat Binnenland in en bestimmte Tiet vun Buten- un Binnenlänners anfardigt wurrn sünd un de nich eerst noch wieder verarbeit weern mütt („Endprodukten“). Göder, de nich wiederverarbeit weern mütt, man ok nich foorts up’n Markt kaamt, man eerst mol in’t Lager stellt weert, gellt ok as Endprodukten.

Wenn een de Priesen up’n Markt ankickt, is dat „Nominale BBP“ afhängig vun de Inflatschoon in de Volksweertschop, wo dat üm geiht. Dat nominale BIP kladdert rup, wenn dat Geld sien Weert verleert un sackt af, wenn dat Geld mit sien Weert rupkladdert.

Wenn een dat nominale BBP vun een Land utreken will, mutt he düsse Saken weten:

• den Weert vun de Produktschoon
• wat vördem dor rinbottert wurrn is (Vörleisten)
• de Stüern
• de Subventschonen

Wie dat utrekent weern kann, kann een hierachtern lesen

[Ännern] Utreken

Dat BBP kann up verscheden Aart utrekent weern. Egolweg, up wat vun Aart een dor bigeiht: För jede bestimmte Volksweertschop kümmt dor in desülvige Tiet datsülvige bi rut.

• Utreken vun’t Tostannkamen her. Toeerst mol weert vun den Weert vun de Produktschoon de Vörleisten aftrocken. Dat is dat Geld, wat dor vörweg eerst mol rinsteken wurrn is. Denn hett een „dat, wat dor Brutto bi rutkamen is“. Dor mütt denn noch de Stüern up de Göder torekent weern. Up de annere Siet mütt de Subventschonen aftagen weern. Wenn een dat daan hett, denn steiht dor dat Bruttobinnenlandprodukt an’t Enn.

• Utreken vun den Verbruuk her. Toeerst mol warrt tohopenstellt, wat vun Utgaven för den Verbruuk bi de privaten Huusholden un bi de privaten Organisatschonen, de keen Geld verdenen wüllt, vörliggt. Dor kaamt denn noch de Utgaven vun den Staat to. Denn warrt noch hento rekent, wat brutto in de Produktschoon rinbottert wurrn is (Brutto-Investitschonen, mit Verännern in de Lagers) un wat bi’n Export rutkümmt. Vun den Export warrt de Import aftagen (Butenbidrag).

• Utreken vun dat Verdelen her :Hier warrt ansett bi dat Inkamen vun de düütschen Staatsbörgers, dat bi de Produkschoon vun Göder un Deenstleisten tosamenkümmt.

Wenn de Afschrieven vun dat BBP aftagen weert, denn kümmt dor dat Nettobinennlandprodukt bi rut.

[Ännern] Bruttobinnenlandprodukt pro Kopp

Dat BBP pro Kopp is dat Bruttobinnenlandprodukt deelt dör de Tall vun de Inwahners vun en Land. Faken warrt dat so angeven, dat dor de Inflatschoon in de verscheden Länner al mit inrekent is. So kann een dat goot verglieken, wat vun Kraft de Weertschop in de verschedenen Länner hett.

[Ännern] Bruttobinnenlandprodukt un Inflatschooon

[Ännern] Dat nominale BBP

Meist weert de Binnenlandprodukten vun verscheden Länner oder Kuntreien vergleken mit Hölp vun dat nominale BBP. Dor is de Geldweert nich mit inrekent. Je höger de Inflatschoon in en Land is, üm so höger kladdert ok dat BBP. Wenn en Land 5% Inflatschoon hett, denn so hett dat ok 5% mehr BBP.

[Ännern] Dat reale BBP

Wie dat reale BBP in Düütschland vun 1950 bit 2000 wussen is, na Horst Afheldt

Wenn een dat BBP ankieken will unafhängig vun de Priesen, de sik ännert, denn nümmt een dat reale BBP. Dor warrt de Weert vun all Göder un Deenstleisten to de Priesen vun en Grundjohr utrekent (BBP mit fasten Priesen). In leste Tiet weert ok Keddenindizes bruukt.

Dat reale BBP kann een ok ut dat nominale BBP rutreken. Dor mutt en bloß dat Kladdern vun de Priesen vun dat Grundjohr af an bi kennen. Hier warrt de Formel bruukt:

[Ännern] Kiek ok bi

• List vun de Länner na dat Bruttobinnenlandprodukt
• List vun de Länner na dat Bruttobinnenlandprodukt pro Kopp

[Ännern] Weblinks

• Statistisches Bundesamt: Statistik von A - Z: Bruttoinlandsprodukt (hoochdüütsch)
• Deutsche Bank Research: BIP allein macht nicht glücklich – Wohlergehen messen ist sinnvoll, aber schwierig, 4. Oktober 2006 (hoochdüütsch)