Heks Hasje
Van Wikipedie
Heks Hasje is n Grunnegs mythisch figuur uut Westerwolde. Rond dizze vraauw gait n sage rond. Omdat zai bie Zèlng woonde, is dizze sage veural in Zèlng bekend.
In Zèlng is t kavvee De Heksenketel vernuimd noar Heksje Hasje. Ook de Hassebaarg komt op dizze menaaier aan zien noam.
[bewark] De Sage
Hail, hail laank leden, dou in Westerwolde alles nog moor, klain en mainschoar was, leefde der in n heksie te midden van aandere heksen, trollen en witte wieven. Dit heksie was hail klain en har aait kolle vouten van t drabbege moor. Zai was voak verkolden en naisde doarom slim veul. "Hatsjie, hatsjie"... Al gaauw nuimde man heur doarom "Hasje".
Zai wuir veul taargd deur elkenain, veural deur dij oakelke witte wieven dij aan de baank van t lutje revierke huusden. Hasje besloot om mor te verhuzen. Zai steeg op heur bezzempie en zwaaierf over de moorn en t Westerwold. Op ains zag zai n lutje heuvel mit baarken en wenen. "Hier blief ik", docht zai. Zai muik waarme slovvies van zaachte bloader en n stel nije bezzempies van weensprikken. As t duuster wuir stookde zai n vuurtje om zok te waarmen en om wat licht te hebben. De waainege mìnzen dij soavonds heur weg zochten over de tangen deur t moor, zagen t lichtschiensel en belaandden op Hasje's heuvel van woar zai ander dag heur weg weer vonden. As Hasje op heur bezzem rondvloog en kwoadwillende mìnzen aankommen zag, gong zai as de ment noar beneden en doofde t vuurtke, zodat zai verdwoalden mit alle gevolgen vandain.
Zo vergong t ook n rieke keuneng, dij mit n kare gold deur t moor raaisde. Hasje har vernomen dat hai zien onderdoanen uutmaargeld har en hail min behaandeld har. Dou hai vlak bie de heuvel was, doofde zai t vuur. Hai was bienoa boven dou de woagen votzakde, kantelde en mit de keuneng en al t moor in zonk. Tot nau tou het man nog niks van t gold opdolven.
Zo laankzoamerhaand nuimden de mìnzen dij zaandheuvel "Hasjesbaarg", loater verhaspeld tot Hassebaarg of hasselbaarg... Der kwamen deur de joaren hìn aal meer mìnzen in Westerwolde wonen. Dizze mìnzen gongen t veen uutgroaven en der ontstonden vennen en baauwlaand. t Moor verdween laankzoam en der wuir op zaaid en wonnen. Hasje begon zok aal minder op heur gemak te vuilen in t Westerwoldse laand en vloog op heur bezzem zuudoostwoarts, wieder en wieder tot zai zich weer neerluit op n hogere en meer beboste heuvel in de buurt van n grode revier midden in Duutslaand. Doar ligt den ook n ploats Hasselberg woar Hasje en heur femilie nog aal wonen en zok thuus vuilen.
Messchain ... as joe op n duustere oavond of nacht ais op de Hassebaarg kieken goan, vinden joe nog femilie van heur tuzzen de stroeken of in n holle boom. En as joe n vuurtje in t duuster zain op de Hassebaarg, waiten joe t wizze!
