Reinhard F. Hahn
Vun Wikipedia
Reinhard Franz Hahn (buten Düütschland ok Ron Hahn nöömt, Schrieversnaam ehrmaals Franz Brookmann; * 24. August 1947 in Hamborg) is ’n düütsch-austraalsch-amerikaanschen Plattdüütsch-Schriever.
Hahn is in Hamborg (Hamborg-Willemsborg) boren un tagen. He hett in Israel (Galiläa), Australien (Perth un Fremantle) un China (Beijing un Nanjing) wahnt un wahnt upstünds in de Verenigten Staaten vun Amerika (Seattle).
In Australien un China hett he Sinologie, Oostasienkünn, Süüdoostasienkünn, Malaisch/Indoneesch un Japaansch studeert, later in Amerika ok noch Zentraalasienkünn un altaische Spraken. He hett sik besünners mit de Minnerheitsspraken vun China bemengt. Sien Studeern hett em later in’t Privaatläven na de ole Spraak vun sien egene Heimaat un sien egenen Lüüd’ trüggbröcht, de nu ok ’n Minnerheitsspraak in ehr egen Rebeed is un lang minnachtig ankäken un ünnerdrückt weer.
Vun Hahn sien plattdüütschen Warken is ’n Barg in Tiedschriften un Anthologie-Böker ünner de Lüüd’ kamen, de mehrsten vun de Freudenthal-Sellschupp rutbröcht. He bemengt sik besünners mit dat Œverdrägen vun frömdspraakliche Warken in’t Plattdüütsche un vun’t Plattdüütsche in annere Spraken. He will sik afrieten, dat de Welt wat vun’t Plattdüütsche to wäten kriggt, dat de Spraak wied un sied as egenstännig ankäken wardt un dat „Plattsnackers“ un „Plattschrievers“ in de hele Welt tohoopkaamt.
Hahn bedrifft in’t Internett siet 1995 ok de Mailinglist Lowlands-L, de sik mit Themen befaten deit, de mit de Spraak vun de Rebeden an de Noord- un Oostseeküst, de nedderen Lannen, so as Plattdüütsch, Nedderlannsch un Freesch, to doon hebbt, ok mit de Spraken, de vun jüm afstammen doot, so as Engelsch un Afrikaans.
1998 hett Hahn bi’n Freudenthal-Pries mit Vadderland - Vadderspraak, un annere Riemels ahn Riem den tweten Pries krägen. 1999 hett he tohoop mit Hellmer Stumberg denn ok den eersten Pries krägen, för siene Gedichten elektroonsche elegien - lyrik för de jaardusendwenn.
[Ännern] Warken
- Spoken Uyghur. University of Washington Press, Seattle 1991, 2007
[Ännern] Weblenken
- ’n paar vun sien Gedichten (plattdüütsch, hoochdüütsch, engelsch)
- List Lowlands-L (verschedene Spraken)
- Nu is de Welt platt Platt-Schakels wied un sied (verschedene Spraken)
- Drempels un Tegels vun’t Neddersassische (plattdüütsche Grammatik, hoochdüütsch un engelsch)
- So herrli klingt mi keen Musik un singt keen Nachdigal (Riemels vun Klaus Groth mit Hahn sien engelsch Œverdrägen)
