Mallorca
Vun Wikipedia
Mallorca is mit 3640 km² de gröttste Insel vun de Balearen un hört to Spanien. Vun Westen na Oosten mett se 100 km un vun Noord na Süüd ungefähr 75 km. De Küst is 300 km lang. De Insel hett 760 000 Inwahners. Alleen in de Hööftstadt Palma de Mallorca leevt 370 000 Minschen.
Dree Landschappen laat sik düütlich vunannern ünnerscheden: de Küstenbargen, de sik mit ene Brede vun 10 km vun Noordoost na Süüdwest hentreckt, de grote Evene twüschen Palma, de Bucht vun Alcudia un de Süüdspitz vun de Insel, un letzenns de 5 bet 15 km brede Küstenstriepen in'n Oosten. De hööchste Barg is de Puig Mayor (1445 m) in'n Noorden.
Mallorca hett kene Boddenschätten, is tomeist Agrarland. De grote, künstlich bewaterte Evene is övermaten fruchtbor. En groten Deel vun de landweertschaplichen Produkten kann utföhrt weern. An eerste Steed staht de Mandeln, darna kaamt Johannisbroot, Aprikosen, Fiegen, Olivenöl, Gemüüs, Kantüffeln un Wien. Wichtig is ok de Veehtucht. Jeden Inselbesöker fallt de velen swarten Swienen op. Bi de Industrien, de in Palma, Manacor un Felanitx ansiedelt sünd, hannelt sik dat üm dat Herstellen vun Ledderwaren, Fliesen, Pötterwaren, Wulldeken un Smuck.
Mallorca ward jedet Johr vun Millionen Gäst, besunners ut Düütschland un Grootbritannien besocht. De mehrsten Hotels liggt in un üm Palma. Bi de westlichen Naverstäder gifft dat moie Badestränn. De wichtigsten Sehnswöördigkeiten in Palma sünd de gootsche Kathedraal, de Börs un de velen Palasten mit ehre Binnenhööv, de Patios.
