Johnny Rotten
Vun Wikipedia
Johnny Rotten (* 31. Januar 1956 in London) is een engelschen Muskant un Journalist. Bekannt wurrn is he vunwegen sien Tiet as Sänger vun de Punkband The Sex Pistols un Public Image Ltd (PiL). Sien egentlichen Namen is John Lydon. Dat warrt seggt, de veel bekannter Naam Johnny Rotten is man bloß een Ökelnaam, den he vunwegen siene slechten Tähnen kregen hett oder vunwegen sien leevsten Spruch: You are rotten, you are.
Johnny Rotten wurr 1975, vör allen vunwegen sien beetsche Persönlichkeit, vun Malcolm McLaren as Frontman för de Sex Pistols anworben. Sien besunner Singwies un ok sien giftigen Scharpsinn sünd denn fix dat Kennteken vun düsse Grupp wurrn. De Bassgitarrist Sid Vicious weer sien best Fründ.
Man dat duur nich lang, denn geef dat Theater mit McLaren. Johnny Rotten harr veel to veel Talent, as datt he nah McLaren sien Piepen danzen woll. Dorüm hett he de Gruppen 1978 verlaten. He güng denn nah Jamaika un hett dor een paar Weken mit tobröcht, Künstler för Richard Branson sien Virginlabel antowarven. Butendem hett he noch Upnahmen mit Lee Perry maakt, de aber nie nich rutkamen sünd. Later trock he sik torüch nah een Wohnung in London un hett vör Gericht mit Malcolm McLaren öber Krüüz legen. Tohopen mit Jah Wobble warkel he an een nee Band mit Namen PiL. Dat weer em ganz wichtig, datt för PiL all dat gellen scholl, wo he sik bi de Sex Pistols öber vertöörnt harr: PiL scholl kenen Manager hebben, keen ewig langen Tournees ünnernehmen un jedet Liddmaat vun de Band scholl just so'n groden Andeel an de Band hebben, as de anner. PiL bleef aktiv bit 1992. Dornah hett Rotten sien Memoiren schreben: No Irish, No Blacks, No Dogs.
An't Enne vun de 1990er Jahren hett he een Reunion vun de Sex Pistols tostannen bröcht. Dornah bröch he sien eerst Solo-Album rut: Psycho's Path. Vun dor af an hett he sik mehr mit journalistisch Arbeit befaat. 2004 weer Johnny Rotten bi de engelsche Utgaav vun de TV-Serie Ik bün een Star-Hoolt mi hier rut mit bi.
