Irmtraud Rösler
Vun Wikipedia
Irmtraud Rösler (* 1942) is ene Germanistin.
Rösler is in Oostpreußen boren. Ehre Familie müss na’n Tweten Weltkrieg rut ut dat Land un se hebbt denn in Swerin leevt. Dor is Rösler ok na School gahn un hett 1960 ehr Abitur maakt. 1960 bet 1962 hett se ene Lehr maakt as Schriftsetterin för Akzidenzsaken un hett denn en korte Tiet ok as Schriftsetterin un Korrektorin arbeidt. 1963 hett Rösler dat Studeren an de Universität Jena anfungen op Germanistik un Anglistik. Dat hett se 1967 mit dat Staatsexamen as Lehrerin för Düütsch un Engelsch afslaten. Vun 1968 af an bet 1972 weer se Lehrerin in Swerin un güng denn bet 1977 as Lektorin för Düütsch na Bagdad un Kairo. 1981 hett se an de Universität Rostock ehren Dokter maakt mit ene Schrift Zur Durchsetzung des Hochdeutschen im Schriftverkehr Mecklenburgs. Dor an de Universität hett se denn ok as wetenschopliche Mitarbeiderin arbeidt. 1989 bet 1991 weer se as Gastdozentin an de Universität Danzig. 1991 hett se habiliteert över Syntaktische Normen der mittelniederdeutschen Sprache und ihre soziofunktionalen Determinanten. 1992 kreeg se denn den Job as Perfessersch för Nedderdüütsch an de Universität Rostock. As Gastperfesser hett se ok Vörlesungen maakt an de Universitäten Oslo, Halden, Kopenhagen, Moskau, Riga, Danzig un Triest. 2001 hett se den Ehrendokter vun de Universität vun Lettland kregen för ehre gode Tosamenarbeit mit de lettsche Germanistik un ehre Arbeit to dat Middelnedderdüütsche. För 2007 söcht de Universität Rostock ’n Nafolger för Irmtraud Rösler, de 65 is un emeriteert warrt.
[Ännern] Warken
- Zur Durchsetzung des Hochdeutschen im Schriftverkehr Mecklenburgs. Dissertatschoon, Rostock 1981
- Satz – Text – Sprachhandeln. Syntaktische Normen der mittelniederdeutschen Sprache und ihre soziofunktionalen Determinanten. Habilitatschoon, Universitätsverlag C. Winter, Heidelbarg 1997
