Goten
Vun Wikipedia
De Goten sünd een Volk vun de Germanen ween, dat üm de Tiet vun Christus sien geboort an de Münn vun de Wießel leben dö. Bi de Geographen vun de Antike weern se ünner den Namen Gotonen bekannt. De Naam warrt afleit vun dat gootsche Woort giuthan (geten) oder gutans (gaten). In de tweede Hälft vun dat tweede Jahrhunnert is een Deel vun de Goten nah Südoost hentrocken, nah de Swarte See. In Südosteuropa hefft de Goten in de eerste Hälft vun dat drüdde Jahrhunnert to'n eersten Mal Striet kregen mit dat röömsche Riek. An't Enn vun düt Jahrhunnert delen sik de Goten up in een westlich Grupp (Terwingen) un een östlich Grupp (Greutungen). Later sünd dor de Ostgoten un de Westgoten vun wurrn. Düsse Namen hefft aber mit de Himmelsricht nix to doon. Ostgoten kümmt vun dat Woort Ostrogothi. Dat bedütt Glinstergoten. Westgoten kümmt vun dat Woort Visigothi, dat heet: Gode Goten.
De Greutungen/Ostgoten sünd 375 vun de Hunnen ünnerkregen wurrn. Man as dat mit de Hunnen ut weer, sünd se Bundsgenoten (Foederati) vun de Römers wurrn. 488 hefft se ünner jem ehren König Theoderich den Groten Italien innahmen. Dat warrt seggt, datt hefft se in'n Updrag vun Byzanz maakt. As Theoderich doot weer, is dat Riek vun de Ostgoten uteneenfullen.
De Terwingen/Westgoten hefft in dat Jahr 378 dat ooströömsche Heer ünner Kaiser Valens in de Slacht vun Adrianopel ünnerkregen. Man 382 sünd se al Bundsgenoten wurrn. 401 sünd se nah Italien trocken, wurrn toeerst torüchdreben, man in dat Jahr 410 hefft se ünner jem ehren König Alarich I. Rom innahmen un hefft in'n Anfang vun dat 5. Jahrhunnert een Riek in Gallien grünnt. Vun dor hefft de Franken ehr afdrängelt un nah Spanien verdreben. In dat Jahr 711 weer dat mit de Westgoten ehr Riek toenn, as de Arabers jem ünnerkregen harrn.
[Ännern] Kiek ok nah bi
List vun de Ostgoten ehr Königen
List vun de Westgoten ehr Königen
