Dieter Kalenbach
Vun Wikipedia
Dieter Kalenbach (* 29. August 1937 in Düsseldörp) is en düütschen Comicteekner.
Na sien Studium in Hamborg an de Hamborger Hoochschool för Gestaltung arbeid Kalenbach as fre’en Grafiker un Böhnenbildner un möök vele Reisen, de meist na Skandinavien güngen un dor speziell na Lappland.
Sien wichtigst Wark, dat dör disse Reisen inspireert is, is de Comic Turi & Tolk, de ok in mehr Spraken översett is. He keem toeerst 1973 in dat Magazin ZACK rut. Dat geiht üm den lappischen Jung Turi un sien tahm Aadler Tolk.
Opsehn möök de 1989 rutkamene Comic-Biografie vun Adolf Hitler in twee Bänn. De Text weer vun Friedemann Bedürftig mit de Biller vun Kalenbach. De kritische Comic is vun de Bundszentraal för polietsche Bildung un de Stiftung Lesen fördert worrn. Annere, so as Jan Philipp Reemtsma, hebbt em nich good funnen un den Comic as Middel för dat histoorsche Dorstellen vun den Natschonalsozialismus aflehnt.
Kalenbach leevt hüüt mit sien Fro in Brobargen un hett twee Kinners.
[Ännern] Warken
- Hitler, Carlsen, Hamborg, 1989
- 1. - Die Machtergreifung. ISBN 3-551-02826-5
- 2. - Der Völkermörder. ISBN 3-551-02830-3
- Turi & Tolk. Verl. Jurgeit, Krismann & Nobst, Berlin 2005
- 1. - Die Rentierräuber.
[Ännern] Weblenken
- Dieter Kalenbach sien Websteed (hoochdüütsch)
