Pruvincja de Sundri
Da Wikipedia.
 |
Quest articol chì l'è assee ben faa e l'è mia de trà via | |
 |
Cheest artícul al è scrivüü in koiné uçidentala, urtugrafía ünificada. |
- Süperfiss: 3.212 km²
- Pupulazziun (ISTAT 2001): 177.578 ab.
- Densitaa: 55 ab./km²
- Nümer de cumün: 78
- Capitaal (pup. 2004): Sundri (22.020 ab.)
La pruvincja de Sundri la sa esteent in de la Lumbardìa del Nòort, in de la Valtelina, ca l'è la part süperiuur del basin de l'Ada; la valada scavada dal fiümm l'è prufunda, vist che da i 4.000 meter dii muntagn püssee voolt sa tuchen i 200-300 meter in del fuunt. Un muntun de valètt lateraj a tribüten a l'Ada, föra che dü: la val de Livign, in del curnin nurdest, ca la manda l'acqua a l'Inn, e dunca al Danübi, e la val de Lei, in del curnin nurdovest, ca ga la manda al Renu.
La val de Pus·cjaaf, anca sa l'è deent in del basin de l'Ada, l'è però minga part de la pruvincja vist ca la sa tröva in Svìzzera.
Ul paesacc de la pruvincja l'è antrupizaa in manera pesanta dumé in del sciröö de la Valtelina; in dii olter part, vist i muntagn, l'ambieent natüraal l'è pütòost begn cunservaa. In de la pruvincja a gh'inn dii tocch dii zòn prutett püssee graand de la regjun (Parch Nazziunaal del Stelvi e Parch dii Uròbi Valtelinees.
La pruvincja l'è la men pupulada e pupulusa de la Lumbardìa, vist i sò cundizziun natüraj: de citaa graand ga n'è minga, e anca ul cumün de Sundri al g'a un pu' püssee de 20.000 abitaant; la segunda citadina a l'è Murbègn, cunt un 10.000 abitaant abundaant. In dii ann passaa gh'è staa, cumé anca in olter sitt, ul spupulameent de la muntagna; da un quaj ann inveci i paesòtt püssee gròss de la media e olta muntagna a inn dree a guadagnà pupulazziun, vist ul svilüpp del türiism.
E propi ul türiism l'è la resursa ecunomica püssee impurtanta de la pruvincja, vist che l'agricultüra l'a faa dii pass indree (la resta impurtanta dumé la prudüzziun dii pòmm): l'indüstria a l'è in tütt i maneer preseent in sül teritòri, anca se cunt azieent prevalentemeent piscinitt.
 |
Pruvinz dela Lumbardìa | |
|---|---|---|
| Bergum | Brèssa | Còmm | Cremuna | Lecch | Lòot | Mantua | Milan | Munza e Brianza | Pavìa | Sundri | Varees | ||
