Briscola (tiatro)
Da Wikipedia
Opera leiteaia in zeneise de Plinio Guidoni
Atto Primmo
I ommo : Un giorno... l'ëa de primmaveia, me pâ...
II ommo : Verso a meitæ de arvî.
I ommo : E niätri passeggiàvimo inte'n bòsco.
II ommo : Ben, pròpio un bòsco o no ô l'ëa.
I ommo : Ma gh'ëa di ærboi...
II ommo : E mi ëa chinòu zù, verso o rian...Voeiva bagnâme e man...Sentîme l'ægua fresca passâme in mëzo a-e dïe...quande...tutt'assemme...
Donna : Scì?
II ommo : Tutt'assemme...lê o se m'è avvexinòu.
Donna : (dopeu unn-a breve pausa) Lê...chi?
II ommo : Un. (pausa)
Donna : Ma questo un...chi o l'ëa?
I ommo : No se sa. (pausa)
II ommo : Lì pe lì, m'è pasciùo de conóscilo...Sto chì l'ò zà visto, me son dïto...Ma un momento dòppo, no sò quante tempo, o l'è scentòu...Scentòu...da-i euggi, da-a memöia, veuggio dî...Magara o l'ëa ancon lì, ma mi no ô veddeiva ciù...E da allöa, no me son ciù regordòu ninte...nì l'aspëto, nì a voxe e nì o vestî...Ninte.
Donna : (impressionâ) Ma...o v'à dïto quarcösa?
I ommo : Sto chì o l'è o ponto.
Donna : Allöa o v'à parlòu?
II ommo : Oh, scì, che o m'à parlòu...De quello son segùo.
Donna : E no ve sovvegnî cöse o v'à dïto?
II ommo : (Avansando verso o çentro, i euggi fissi innansi) Scì...fòscia...fòscia...o l'à dïto che...dovià succede quarcösa...questo me ô regòrdo...(con angoscia) Quarcösa dovià succede, o l'à dïto.
Donna : (Con voxe strozzâ) Ma cöse?
II ommo : (Torçendosi e man) No ô sò! No ô sò! No ô sò cöse dovià succede. (Pausa) E no sò donde. (Pausa) E no sò... quande. (Se copre a façça co e man. Lungo silençio, poi a donna a se avviçinna a lê)
I ommo : Lasciælo stâ. (A donna se ferma. Oua o II ommo o va lentamente verso a toùa de mancina. O se siede a o posto primma occupoö da o I ommo. Questi, a soa votta, se siede in scia ätra carega. Con gesti affaticai, reprendan in man e carte e zeugano. A donna, pensoa, a la va verso dritta. Poi se gïa verso i doi.)
Donna : Questo, però... no ô capiscio...Perchè chì?...Perchè, pe aspëtâ sta cösa...che a dovià succede, sei vegnùi pròpio chì?...De pòsti ghe n'è mai tanti, a-o mondo.
I ommo : E zà...de pòsti ghe n'è tanti...
II ommo : (Alzando e spalle) Ma un o l'è pægio à l'ätro...I pòsti son tutti pægi.
I ommo : Quande semmo vegnùi via de là...da-o rian...emmo camminòu.
II ommo : Pe coscì, emmo camminòu.
I ommo : E mi, à 'n çerto ponto, me son affermòu...e gh'ò dïto:Ti â faiësci 'na brìscola?
II ommo : Bonn-a idea, mi gh'ò respòsto.
I ommo : Tutti i locali ëan serræ...L'ëa zà neutte.
II ommo : Coscì semmo intræ chì.
