L'ùrtima distruzzioni di Catania pi lava
Di Wikipedia, l'enciclopedìa lìbbira.
La muntagna scassò versu Nicolosi l’ùnnici Marzu dô 1669 e ncuminzau a vummicari un ciumi di focu nfirnali.
Li paisi di Guardia, Malpassu (oggi Belpasso), Munpileri e àutri ca èranu nta la stizza direzzioni, foru prestu agghicati dô ciumi di lava e abbruciaru. La pupulazzioni scappò a Catania, unni fu ricuvirata nta diversi difici di la citati. Appoi, pi lu granni affrussu di pupulazzioni, fu misu a dispusizzioni, fora dâ citati, a sittintriuni, un granni spazziu unni si furmò un grossu burgu, ca oggi addivintau parti di la citati.
Prestu ogni spiranza si scancillò e ci si rinnìu cuntu ca ddu gran ciumi di lava nfucata currìa versu Catania.
Lu Sinatu, allura, ci mannò a diri o viceré, duca di Alburquerque, ca la situazzioni era gravìssima e ci spiò lu primmissu di putiri spènniri qualisiasi cifra di sordi pi fruntiggiari nzoccu stava accadennu: lu primmissu fu datu.
Li casi dê paisi abbruciati, foru spugghiati, prima ca di lu focu, dê latri e dunca ô chianu dâ Porta di Aci, e dô Casteddu, e ntâ chiazza dô mircatu foru chiantati li furchi. Tutti li Porti vìnnuru chiusi e nta tri di iddi foru misi tri Nòbbili pi cuntrullari lu ngressu di genti suspetta. Fu fattu un “ monti di Pietati” cu li sordi ca pruntamenti ci misi ginirusamenti lu prìncipi di Biscari Agatino Paternò. Pani e vìviri vìnnuru spartuti a la chiù misiràbbili genti.
Quannu arrivò a Catania lu ciumi di lava ncanniscenti, nta sei uri cummigghiau tuttu lu lagu di Nicitu e lu vadduni ca l’atturniava. Lu sìdici di Aprili, doppu ca sdirubbò l’acquidotti ca purtàvunu l’acqua a Catania, agghiuncìu e superau lu Vastioni di li nfetti, allagau li mura ca si stinnìanu dô Vastiuni finu â Porta dê canali e cummigghiò li ruvini dâ Naumachia e dô Circu màssimu; appoi cummigghiò li Vastiuni di S.Giorgiu e di S. Cruci sutta lu Casteddu; distruggìu 36 canali ntâ marina, mentri Porta dê canali fu murata cu muru duppiu, pi bluccàrici la strata a la lava. La lava trasìu ntô mari, pi na larghizza di dui migghia e na lunghizza versu lu mari di n’àutru migghiu.
L’ùrtimu Jornu di Aprili, fù pi Catania n’àutru jornu di granni scantu: lu turrenti di focu dô Vastiuni dô tunnaru, ca parìa stutatu, mannau fora n’àutra currenti nova, ca entrò ntô giardinu dê binidittini; spartutu nta dù novi lingui, una di idda niscìu ntâ strata e ancanghiò bruciànnula la cresia di S.Maria Maggiori e tanti giardini; l’àutra lingua, doppu ca cummigghiò lu chianu avanti a cresia dô munasteru, currìu versu li cresi di S. Bàrbara e S. Crispinu e appoi versu la cuntrada dô Cursu, unni abbbruciau tantìssimi casi.
Catania fu distrutta n’àutra vota.
Catigurìi: Vurcanismu | Etna | Catania | Sicilia